"ДЬОЛЛООХ ДЬОННОР КЫРДЬАЛЛАР, ДЬОҺУН СААСКА ТИИЙЭЛЛЭР..."
Бүгүн Тылгыныбыт нэһилиэгэр "Түһүлгэ" сынньалаҥ киинигэр нэһилиэкпит Аҕам саастаах дьонноругар анаан сүрдээх үчүгэй тэрээһин буолан ааста. Аҕам саастаах дьоммут, норуоппут муудараһын, өбүгэлэрбит туһунан үтүө өйдөбүлү илдьэ сылдьар баар-суох ситиммит буолаллар. Дэлэҕэ даҕаны, норуот өс хоһоонугар "кырдьаҕаһы хааһахха сүгэ сылдьан сүбэлэт" диэн этиллэр. Бу күнү аан дойдуга 1991 сылтан бэлиэтииллэр. Ытык-мааны дьоммутугар анаммыт күммүт, сахалыы астаах мааны сандалы тула олорууттан саҕаланна. Хаһыс да сылларын, баһылык Иванов Е.А. салалтатынан, нэһилиэкпит эр дьонноро, аҕам саастаахтар бырааһынньыктааҕы остуолларыгар анаан, эрдэттэн дьаһанан, тэринэн, бултаан-алтаан, мас көтөрдөөн, куобахтаан, булт астарынан остуол хотойорунан күндүлүүр буолбуттара үтүө үгэскэ кубулуйбута олус үчүгэй. Нэһилиэкпит эр дьонноругар махталбыт муҥура суох. Нэһилиэкпит баһылыга Иванов Е.А. бырааһынньыгынан мустан олорор аҕам саастаах дьоммутун эҕэрдэлээтэ, чэгиэн доруобуйаны баҕарда, биһиги кырдьаҕас дьоннорбут үтүө сүбэһиттэрбит буолаллар диэтэ. Үбүлүөйдээх дьоммутугар тэрилтэлэр кыттыһан оҥорбут бэлэхтэрин, олохтоох дьаһалта специалиһын Васильева А.И. кытта үөрүүлээх быһыыга-майгыга туттардылар.
"Түһүлгэ"сынньалаҥ киин үлэһиттэрэ тэрийбит дьахталларга "Эдэр сааспын санатар күндү киэргэллэрим" диэн киэргэл күрэҕэр 4 кыттааччы кытынна. Чахчыта даҕаны, олус да кэрэ киэргэллэри биһиги аҕам саастаах кэрэ аҥаардарбыт кэппит эбиттэр эдэр сылдьан. Күрэх түмүгүнэн 3 миэстэни Матвеева А.П., 2 миэстэни Васильева А.Н., 1 миэстэни Николаева А.Т. ыллылар уонна добун суруктарынан, бириистэринэн наҕараадаланнылар.Эр дьоҥҥо "Эдэр сааһым күөгэйэр күннэрэ" диэн хаартыска күрэҕэр эмиэ 4 кыттааччы кытынна. Эр дьоннорбут эдэр сылдьан олус да кыраһыабай эбиттэр. Түмүккэ, 3 миэстэни Максимов В.И., 2 миэстэни Доранов И.Н., 1 миэстэни Поскачин А.Н. ылан, добун суруктарынан, бириистэринэн наҕараадаланнылар. Күрэххэ кыттыбыт ытык дьоммутугар барҕа махтал буолуохтун.
Бүгүҥҥү тэрээһиҥҥэ элбэх көрдөөх,сонун, толкуйдатар оонньуулар оонньоннулар, аҕам саастаах дьоммут үөрэ-көтө оонньоотулар, оҕо буолан мэниктээн ыллылар. Дьоро күҥҥэ элбэх эҕэрдэ тыллар этилиннилэр, Тылгынытааҕы участковай балыыһа кылаабынай бырааһа Алексеева Л.А., оҕо тэрилтэтин үлэһитэ Доранов И.Н, "Түһүлгэ"сынньалаҥ киин үлэһиттэрэ Иванова Р.Н.,Иванова М.М, Кылабысов А.И. ылбаҕай ырыаларын бар дьонноругар бэлэх ууннулар. Сахалыы астаах мааны сандалы остуолу нэһилиэкпит тэрилтэлэрин, "Кийииттэр" түмсүүлэрин, үлэһиттэрин күүһүнэн, тэрийдибит. Бары ас астаабыт, аһатыыга остуол тэрийсибит кэрэ аҥаардарга тэрийээччилэр ааттарыттан махталбытын тиэрдэбит.Күндү Аҕам саастаах дьоммутун өссө төгүл бырааһынньыккытынан эҕэрдэлиибит. Бу ураты суолталаах күн биһиги аҕам саастаах кырдьаҕастарбытыгар төрөөбүт дойдугут сайдыытыгар сүҥкэн кылааккыт, албан ааттаах үлэҕит,эстибэт эрчимҥит уонна дойду, норуот туһугар бэриниигит иһин истиҥ махтал тылларын аныыбыт. Эһиэхэ кытаанах доруобуйаны, уһун дьоллоох олоҕу баҕарабыт. Аҕам саастаах дьоммут астына алтыстылар, үөрэ-көтө көрүстүлэр.
Виталина Григорьева.
